لأول مرة منذ تأسيسها سنة 2012 جريدة صفروبريس غادي تهضر بالدارجة وكانعتادرو لمتتبعينا على هاد القرار لاحقاش هاد المرة غانوجهو الخطاب ديانا لسي مصطفى الخصم الرايس ديال جماعة موزار كندر لي كايلقا صعوبة باش يفهم اللغة العربية الفصحى وبغينا نهضرو معاه بالدارجة.
سي مصطفى ديما كنتي كاتردد واحد الجملة ماكاتحيدهاش كاع من فمك فجميع خرجاتك الاعلامية لي هي دارولي لعصا فالرويدة او ماخلاونيش نخدم، هانتا اسيدي دابا هاوما صوتو معاك كاع بالاجماع تا واحد ماعارضك او عطاوك الضو لخضر باش تبينا حنت يديك من دابا الفوق غادي نبداو نحاسبوك حنا كسلطة رابعة عطاها الدستور سلطة الرقابة على المؤسسات في إطار الاحترام، سي مصطفى كنتي قلتي يوم التصويت عليك أنك غاترد موزار جنة يالله اسيدي بدا لخدمة دابا ماعندك كاع باش تبرر ايلا فشلتي فالتسيير.
سي مصطفى ياكما تسابك التسيير ساهل صافي يصوتو معاك المجلس يعني راك قطعتي الواد أو نشفو رجليك راك عاد دخلتي فالصح دابا حنا أكيد غاندعيوليك بالنجاح فمهامك لأن أي نجاح هو لصالح الساكنة أولا غير هو دابا الفرق أنه ماعندك باش تبرر أي فشل وحنا نبغيوك تكون حريص على المال العام وماتاكل ما توكل كيما كاتقول ديما يالله اسيدي بالتوفيق او ورينا حنت يديك.